الديرة - الرمادي
من اجيب طاري طريق العراق سوريا ماراح تسمعون صوت الريح بالسيارة وحدها بالبوست لو تريلات سايقها نعسان تفوت من يمك، راح احجيلكم على منفذ الوليد الي راح ينفتح قريباً وتنفتح وياه أبواب مامتوقعها احد.
ماراح احجيلكم عن ارقام رسمية مملة ولا عن بيانات الهيئة الحدودية، انتو سامعين وشايفين المولات؟ بس شايفين طريق راح يصير مول؟
هذا المنفذ ماراح يفتح بس حدود، راح يفتح مطاعم واستراحات وفنادق ومرافق راحة، راح يتحول هذا الطريق لواحة تجارية مو واحة سراب تشوف بيها المي من بعيد.
عدد المطاعم مو 3 لو 4 وبصفها كشك واحد يبيع جاي بارد، الخطوة الاولى تبدي من 12 إلى 25 مطعم.
الطريق الرئيسي الي تمّر منه الشاحنات والسياح يمتد تقريباً 400 كيلو متر من الرطبة لحد الوليد ومابعدها.. كل 60 كيلو متر محطة، لذلك راح نحصّل على 6 الى 7 مواقع رئيسية، بس الواقع اذكى من السالفة..
كل موقع ماراح يكتفي بمطعم واحد، راح يصير مطعم شعبي للسواق وثاني للعائلات وثالث للوجبات السريعة ورابع للمأكولات العراقية السورية المشتركة، يعني ماكو مشكلة تاخذ لفتين وحده من مطعم الصديق ووحده من علي اللامي.
الموضوع مو تخمين، هذا الي صار على طريق بغداد الأردن بعد افتتاحه، وعلى طريق الخليج - الأردن، الطلب يخلق العرض والشاحنات الجايه من دمشق والرايحة لبغداد ماراح ياكلون نساتل بالطريق..
